Baħar
Is-Servizz ta’ Monitoraġġ tal-Ambjent tal-Baħar ta’ Copernicus (CMEMS) jipprovdi informazzjoni ta’ referenza fuq bażi regolari u sistematika dwar l-istat fiżiku u bijoġeokimiku, il-varjabbiltà u d-dinamiki tal-ekosistemi tal-oċean u tal-baħar għall-oċeani globali u għall-ibħra reġjonali Ewropej.
L-osservazzjonijiet u l-previżjonjiet prodotti mis-servizz jappoġġjaw l-applikazzjonijiet kollha relatati mal-baħar, inkluż:
- Is-sikurezza fuq il-baħar;
- Ir-riżorsi tal-baħar;
- L-ambjent kostali u tal-baħar;
- It-temp, it-tbassir staġonali u l-klima.
Pereżempju, il-forniment ta’ data dwar il-kurrenti, l-irjieħ u s-silġ tal-baħar jgħin itejjeb is-servizzi tar-rotot tal-vapuri, l-operazzjonijiet lil hinn mill-kosta jew l-operazzjonijiet ta’ tiftix u salvataġġ, u b’hekk jikkontribwixxi għas-sikurezza fuq il-baħar.
Is-servizz jikkontribwixxi wkoll għall-protezzjoni u għall-ġestjoni sostenibbli tar-riżorsi ħajjin tal-baħar, b’mod partikolari għall-proċess tat-teħid ta’ deċiżjonijiet dwar l-akkwakultura, il-ġestjoni sostenibbli tas-sajd jew l-organizzazzjonijiet reġjonali tas-sajd.
Il-komponenti bijoġeokimiċi fiżiċi u tal-baħar huma utli għall-monitoraġġ tal-kwalità tal-ilma u għall-kontroll tat-tniġġis. Iż-żieda fil-livell tal-baħar hija indikatur ewlieni tat-tibdil fil-klima u tgħin tivvaluta l-erożjoni kostali. Iż-żieda fit-temperatura tal-wiċċ tal-baħar għandha konsegwenzi diretti fuq l-ekosistemi tal-baħar u fuq id-dehra taċ-ċikluni tropikali. Bħala riżultat ta’ dan, is-servizz jappoġġja firxa wiesgħa ta’ applikazzjonijiet tal-ambjent kostali u tal-baħar.
Il-biċċa l-kbira tad-data li tingħata mis-servizz (eż. it-temperatura, is-salinità, il-livell tal-baħar, il-kurrenti, ir-riħ u s-silġ fil-baħar) għandha rwol kruċjali wkoll fid-dominju tat-tbassir tat-temp, tal-klima u staġonali. Is-servizz kull sena jippubblika r-Rapport dwar l-Istat tal-Oċeani li jipprovdi opinjonijiet dwar is-sitwazzjoni attwali u t-tendenza fis-saħħa tal-oċeani minħabba t-Tibdil fil-Klima.
Għal preżentazzjoni aktar dettaljata tas-Servizz ta’ Monitoraġġ tal-Ambjent tal-Baħar ta’ Copernicus, jekk jogħġbok irreferi għall-iskeda informattiva mehmuża u għas-sit web tas-servizz.
Il-prodotti li jingħataw mis-servizz ta’ monitoraġġ tal-ambjent tal-baħar ta’ Copernicus huma pprovduti mingħajr ħlas lill-utenti rreġistrati permezz ta’ katalgu interattiv. Fuq l-istess sit web hemm ukoll disponibbli verżjoni pdf li tista’ titniżżel tal-katalgu tal-prodotti.
Dawn il-prodotti jinkorporaw deskrizzjoni tas-sitwazzjoni attwali (Analiżi), il-varjabbiltà tagħha fuq skali spazjali u temporali differenti, it-tbassir tas-sitwazzjoni ftit jiem minn qabel (Tbassir), u l-forniment ta’ rekords tad-data retrospettivi konsistenti għas-snin riċenti (Analiżi mill-ġdid).
F’Novembru 2014, il-Kummissjoni Ewropea ffirmat Ftehim ta’ Delega ma’ Mercator-Océan International għall-implimentazzjoni tas-servizz. Il-verżjoni pubblika tal-Anness Tekniku ta’ dan il-ftehim hija disponibbli fir-Repożitorju tad-Dokumenti (taħt Dokumenti Tekniċi) li huwa disponibbli fuq dan is-sit web. Is-servizz ilu jingħata f’modalità operazzjonali mill-1 ta’ Mejju 2015.