Fil-każ tal-awtoritajiet pubbliċi

Il-programm Copernicus jipproduċi petabytes ta’ data kull sena. Sabiex dawn jintużaw u ċ-ċittadini tal-UE jibbenefikaw minnhom, l-utenti attwali u potenzjali jeħtieġ li jiġu mgħarrfa dwar il-qawwa tad-data u jingħataw il-mezzi kif jisfruttawha bl-aktar mod effiċjenti.

Bħala konsegwenza, qegħdin jirriżultaw ħafna ideat u kunċetti ġodda f’termini tal-Adozzjoni mill-Utenti u qed joqorbu żminijiet eċċitanti għall-utenti ta’ Copernicus!

Wieħed mill-objettivi tal-Kummissjoni Ewropea huwa li timmassimizza l-użu tad-data ta’ Copernicus mill-utenti aħħarin pubbliċi u għalihom, li jinkludu l-awtoritajiet nazzjonali u lokali u lil dawk li jfasslu l-politika, kif ukoll l-impjegati taċ-ċivil b’mod ġenerali.

Abbażi ta’ dan l-objettiv, ġew implementati għadd ta’ azzjonijiet mill-Kummissjoni, bħat-tnedija tar-Relays ta’ Copernicus u l-Akkademja ta’ Copernicus, żewġ networks biex jaqdu liċ-ċittadini tal-UE u mhux tal-UE, l-akkademiċi, l-intraprendituri u n-negozji u l-Forum għall-Utenti ta’ Copernicus, struttura ta’ governanza magħmula minn esperti nnominati mill-Pajjiżi Parteċipanti ta’ Copernicus li jagħtu pariri lill-Kummissjoni fir-rigward tal-identifikazzjoni ta’ rekwiżiti tal-utenti, il-verifika tal-konformità tas-servizz u l-koordinazzjoni tal-utenti tas-settur pubbliku.

Il-Ministeru Spanjol għat-Tranżizzjoni Ekoloġika (MITECO),li huwa wieħed mir-rappreżentanti ta’ Spanja fil-Forum għall-Utenti ta’ Copernicus, identifika użu baxx tad-data u tal-informazzjoni ta’ Copernicus fi ħdan l-entitajiet pubbliċi minħabba l-għarfien limitat tal-benefiċċji li Copernicus jista’ jintroduċi fil-fluss tax-xogħol tal-amministrazzjoni pubblika Spanjola.

Għal din ir-raġuni, u minħabba l-fatt li t-taħriġ għall-awtoritajiet pubbliċi dwar l-użu ta’ Copernicus huwa waħda mill-prijoritajiet biex jiġi promoss l-użu tal-Programm Ewropew, il-Ministeru qed jimplimenta serje ta’ attivitajiet ta’ taħriġ għall-Utenti ta’ Copernicus.  Mill-2017, il-Ministeru, b’mod konġunt mal-Laboratorju għall-Ipproċessar tal-Immaġnijiet tal-Università ta’ Valencia (waħda mir-Relays ta’ Copernicus), organizza sessjoni ta’ ħidma ddedikata biex juri kif Copernicus jista’ jikkontribwixxi għall-monitoraġġ tal-istatus ekoloġiku tal-korpi tal-ilma interni, kostali u tranżitorji, u kif id-Direttorat Ġenerali għall-Ilma jista’ jintegra din l-informazzjoni fl-attivitajiet tal-monitoraġġ u tar-rapportar tiegħu.

Is-sessjoni ta’ ħidma, li saret kors ta’ taħriġ uffiċjali fil-Pjan tat-Taħriġ Ġenerali tal-Ministeru għall-impjegati taċ-ċivil, kull sena tiffoka fuq il-promozzjoni tal-użu ta’ Copernicus; l-identifikazzjoni tar-rekwiżiti tal-utenti u tal-utenti potenzjali (b’għarfien dwar it-telerilevament jew mingħajru); u l-valutazzjoni ta’ nuqqasijiet potenzjali bejn is-servizzi u l-prodotti ta’ Copernicus u l-ħtiġijiet tal-utenti pubbliċi.

Elisa Rivera Mendoza mill-MITECO, u l-koordinatur tal-Forum Nazzjonali Spanjol għall-Utenti ta’ Copernicus, spjegat li “prova ċara li għad fadlilna ħafna aktar x’nagħmlu hija l-użu limitat tal-prodotti u tas-servizzi ta’ Copernicus mill-amministrazzjonijiet pubbliċi, li huma waħda mill-akbar komunitajiet potenzjali ta’ utenti. Jekk il-benefiċċji u l-applikazzjonijiet ta’ Copernicus ikunu magħrufa sew, id-domanda għal tali prodotti tiżdied fir-ritmu. L-attivitajiet ta’ adozzjoni ta’ Copernicus fi Spanja tnisslu biex jiżguraw li l-programm ikun aktar magħruf u għalhekk jintuża b’mod aktar mifrux.”

 

Allura, l-awtoritajiet pubbliċi u l-impjegati taċ-ċivil għaliex u kif jistgħu jintegraw id-data ta’ Copernicus fil-fluss tax-xogħol tal-ġestjoni tal-ilma tagħhom?

L-informazzjoni dderivata minn Copernicus tista’ tkun komplementarja għall-informazzjoni in situ li l-amministrazzjonijiet pubbliċi diġà qed jittrattaw, u tista’ tintuża għal skopijiet ta’ rapportar, bħar-rapportar nazzjonali dwar il-kwalità tal-ilma skont id-Direttiva Qafas dwar l-Ilma u d-Direttiva dwar in-Nitrati.

Informazzjoni u fatturi varjabbli affidabbli (eż. il-kwalità tal-ilma, id-dinamika tat-tira, il-livelli tal-evapotraspirazzjoni, il-konsum tal-ilma f’uċuħ saqwija) urew li kienu utli ħafna għall-awtoritajiet pubbliċi involuti fil-ġestjoni tar-riżorsi idriċi. Għalhekk, l-immaġnijiet mis-satelliti Sentinel ta’ Copernicus jistgħu jikkontribwixxu għall-monitoraġġ tar-riżorsi tal-ilma naturali u disponibbli ta’ Spanja u jservu bħala input għall-baċiri idrografiċi u għall-pjanijiet tal-ġestjoni tal-ilma rispettivi.

L-informazzjoni mis-servizzi ta’ Copernicus ukoll tista’ tkun utli ħafna, pereżempju informazzjoni mis-Servizz ta’ Monitoraġġ tal-Art ta’ Copernicus biex jiġi mmonitorjat l-użu ta’ nitrati li jispiċċaw iniġġsu x-xmajjar, il-lagi u l-akwiferi; Prodotti għall-kopertura tal-art / l-użu tal-art ta’ Riżoluzzjoni Għolja Ħafna f’żoni riparji; kif ukoll informazzjoni dwar il-monitoraġġ tal-kwalità tal-ilma kostali mis-Servizz ta’ Monitoraġġ tal-Ambjent tal-Baħar, eċċ.

L-użu tad-data tal-Osservatorju tad-Dinja jtejjeb il-kwalità tad-data li tintuża mill-amministrazzjonijiet pubbliċi. Dan ikollu impatt konsiderevoli fuq il-ġestjoni u l-proċess tat-teħid ta’ deċiżjonijiet – peress li l-awtoritajiet pubbliċi u l-impjegati taċ-ċivil li jkollhom informazzjoni aktar preċiża dwar ir-riżorsi naturali jistgħu jieħdu deċiżjonijiet infurmati aħjar u aktar effiċjenti, u jistgħu jissimplifikaw l-obbligi tar-rapportar fir-rigward ta' diversi direttivi nazzjonali u tal-UE.

Il-programm Copernicus jista’ jipprovdi wkoll informazzjoni dwar iż-żoni suxxettibbli għall-għargħar. Dan jista’ jservi lill-amministrazzjoni pubblika biex jittejbu l-metodi għad-delinjazzjoni ta’ dawn iż-żoni, u għalhekk biex jiġu vvalutati u mminimizzati aħjar il-ħsarat fil-każ ta’ avvenimenti ta’ għargħar.

Riżultat ieħor tas-sessjoni kien li l-awtoritajiet pubbliċi jistgħu jiksbu informazzjoni ta’ Copernicus biex jimmonitorjaw il-ktajjen tal-muntanji u jikkwantifikaw il-volum ta’ borra li tkun ġiet akkumulata f’dawn iż-żoni. Dawn ikunu jistgħu jidentifikaw riskji potenzjali ta’ valangi u għargħar matul perjodi li fihom is-silġ jinħall malajr.

Antonio Ruiz Verdú, mil-Laboratorju għall-Ipproċessar tal-Immaġnijiet tal-Università ta’ Valencia, ta l-opinjoni tiegħu dwar l-attivitajiet tal-Adozzjoni mill-Utenti Spanjoli u nnota li “issa hemm eżempji tajbin fi Spanja ta’ kooperazzjoni bejn l-amministrazzjoni u l-membri tal-Akkademja u r-Relays ta’ Copernicus sabiex jiġu promossi l-opportunitajiet fis-settur downstream ta’ Copernicus. Din il-kooperazzjoni qed tgħin tnaqqas l-hekk imsejjaħ distakk bejn ix-Xjenza u l-Politika”.

Ruiz Verdú enfasizza wkoll li “l-Università ta’ Valencia hija involuta fi proġetti differenti ta’ R&Ż ta’ Copernicus, bl-għan li dan l-għarfien jiġi ttrasferit lill-utenti aħħarin tal-amministrazzjonijiet pubbliċi”.

Bħala messaġġ finali, Elisa Rivera għamlet referenza wkoll għar-“rwol kbir li l-universitajiet u ċ-ċentri għar-riċerka ewlenin għandhom fil-preżent, bħala membri tan-networks tar-Relays u tal-Akkademja, peress li dawn jikkontribwixxu għall-promozzjoni u għall-bini tal-kapaċità fost l-amministrazzjonijiet pubbliċi dwar l-użu tal-prodotti u tas-servizzi ta’ Copernicus”.

MITECO jorganizza attivitajiet ta’ adozzjoni mill-utenti kull sena għall-awtoritajiet pubbliċi u għall-impjegati taċ-ċivil involuti f’firxa wiesgħa ta’ dominji bħal fost l-oħrajn: il-bliet intelliġenti, l-agrikoltura, il-forestrija u n-nirien, l-atmosfera u t-tibdil fil-klima, il-ġestjoni tal-ambjent tal-baħar (fl-2019), il-bijodiversità u l-ekosistemi (fl-2019).