Sigurtà

Skopri s-Sorveljanza fil-Fruntieri  Skopri s-Sorveljanza Marittima  Skopri l-Appoġġ għall-Azzjoni Esterna tal-UE

 

Is-servizz ta’ Copernicus għal applikazzjonijiet ta’ Sigurtà għandu l-għan li jappoġġja l-politiki tal-Unjoni Ewropea billi jipprovdi informazzjoni bħala tweġiba għall-isfidi marbuta mas-sigurtà tal-Ewropa. Dan itejjeb il-prevenzjoni, it-tħejjija u r-reazzjoni għall-kriżijiet f’tliet oqsma ewlenin:

• Is-sorveljanza fil-fruntieri;
• Is-sorveljanza marittima;
• L-appoġġ għall-Azzjoni Esterna tal-UE.

 

Is-sorveljanza fil-fruntieri

Fil-qasam tas-sorveljanza fil-fruntieri, l-objettivi ewlenin huma li jitnaqqas l-għadd ta’ mwiet tal-immigranti illegali fuq il-baħar, li tiżdied is-sigurtà interna tal-Unjoni Ewropea u li tiġi miġġielda l-kriminalità transkonfinali.

Permezz ta’ ftehim li ġie ffirmat fl-10 ta’ Novembru 2015, il-Kummissjoni Ewropea fdat lil FRONTEX il-komponent tas-sorveljanza fil-fruntieri tas-Servizz tas-Sigurtà ta’ Copernicus. L-objettiv huwa li l-qafas tal-iskambju tal-informazzjoni dwar is-sorveljanza fil-fruntieri esterni tal-UE (EUROSUR) jiġi appoġġjat billi tiġi pprovduta data qrib il-ħin reali dwar dak li qed jiġri fuq l-art u fil-baħar madwar il-fruntieri tal-UE.

 

Is-Sorveljanza Marittima

Fil-qasam tas-sorveljanza marittima, l-objettiv ġenerali tal-Unjoni Ewropea huwa li tappoġġja l-objettivi tas-sigurtà marittima tal-Ewropa u l-attivitajiet relatati fid-dominju marittimu. L-isfidi korrispondenti primarjament huma relatati mas-sigurtà fin-navigazzjoni, l-appoġġ għall-kontroll tas-sajd, il-ġlieda kontra t-tniġġis tal-baħar, u l-infurzar tal-liġijiet fuq il-baħar.

Permezz ta’ ftehim li ġie ffirmat fit-3 ta’ Diċembru 2015, il-Kummissjoni Ewropea fdat lill-EMSA bl-operazzjoni tal-komponent tas-sorveljanza marittima tas-Servizz tas-Sigurtà ta’ Copernicus. Skont il-ftehim, l-EMSA tuża d-data spazjali mis-Sentinel 1 ta’ Copernicus u minn satelliti oħra flimkien ma’ sorsi oħra ta’ informazzjoni marittima biex timmonitorja b’mod effettiv l-oqsma marittimi ta’ interess.

 

Appoġġ għall-Azzjoni Esterna tal-UE

Bħala attur globali, l-Ewropa għandha r-responsabbiltà li tippromwovi kundizzjonijiet stabbli għall-iżvilupp uman u ekonomiku, id-drittijiet tal-bniedem, id-demokrazija u l-libertajiet fundamentali. F’dan il-kuntest, l-UE tista’ tipprovdi assistenza lill-pajjiżi terzi f’sitwazzjoni ta’ kriżi jew kriżi emerġenti u tgħin tipprevjeni t-theddid globali u transreġjonali li jkollu effett destabilizzanti.

Permezz ta’ ftehim li ġie ffirmat fis-6 ta’ Ottubru 2016, il-Kummissjoni Ewropea fdat liċ-Ċentru Satellitari Ewropew (EU SatCen) bil-komponent tal-Appoġġ għall-Azzjoni Esterna (SEA) tas-Servizz tas-Sigurtà ta’ Copernicus. B’mod partikolari, il-komponent tal-SEA se jassisti lill-UE fl-operazzjonijiet tagħha, filwaqt li jipprovdi lil dawk li jieħdu d-deċiżjonijiet informazzjoni ġeografika dwar żoni remoti u li jkunu diffiċli li jiġu aċċessati, fejn ikunu involuti kwistjonijiet ta’ sigurtà. Dan huwa primarjament immirat lejn l-utenti Ewropej iżda jista’ jiġi attivat ukoll minn partijiet ikkonċernati Internazzjonali ewlenin, skont kif ikun xieraq skont il-ftehimiet ta’ kooperazzjoni Intenazzjonali tal-UE.

 

 Għal preżentazzjoni aktar dettaljata, jekk jogħġbok irreferi għall-iskeda informattiva mehmuża.